- 2026-11-05
- pl
Sancti Zacharíæ, Sacerdótis et Prophétæ, qui pater éxstitit beáti Ioánnis Baptístæ, Præcursóris Dómini.
Item sanctæ Elísabeth, eiúsdem sanctíssimi Præcursóris matris.
Tarracínæ, in Campánia, natális sanctórum Mártyrum Felícis Presbýteri, et Eusébii Mónachi. Ex his Eusébius, cum sepelísset sanctos Mártyres Iuliánum et Cæsárium, et multos convérteret ad fidem Christi, quos sanctus Felix Présbyter baptizábat, una cum ipso Felíce tentus est; et, ad Iúdicis forum ducti nec superáti, inde in cárcerem inclúsi, ambo, nocte eádem, cum sacrificáre noluíssent, decolláti sunt.
Eméssæ, in Phœnícia, sanctórum Mártyrum Galatiónis et Epistémis cóniugis, qui in Décii persecutióne, flagris cæsi, mánibus pedibúsque et lingua ínsuper mutiláti, dénique, truncáto cápite, martýrium consummárunt.
Item sanctórum Mártyrum Domníni, Theótimi, Philóthei, Silváni et Sociórum, sub Maximíno Imperatóre.
Medioláni sancti Magni, Epíscopi et Confessóris.
Bríxiæ sancti Dominatóris Epíscopi.
Tréviris sancti Fibítii, qui ex Abbáte factus est eiúsdem civitátis Epíscopus.
Aureliánis, in Gállia, sancti Læti, Presbýteri et Confessóris.
Et álibi aliórum plurimórum sanctórum Mártyrum et Confessórum, atque sanctárum Vírginum.
℟. Deo grátias.
- null